Questo sito utilizza esclusivamente cookie tecnici di sessione, con la sola finalità di permettere la normale navigazione delle pagine web. Non vengono utilizzati cookie di profilazione o tracciamento. Informativa Cookie

Sabato, 18 Novembre 2017
Impostazioni di visualizzazione: 

www.gabrieleortu.it – Copyright © Gabriele Ortu, tutti i diritti riservati

Perdas (*)

A Faustino Onnis

Perdas mannas e piticas.
Perdas a terra fitas.
Perdas de irriu: codula
Allisada de sa memoria
De su tempus ch’est passau.
Perda tunda de imperdau.
Perda de muru de sicu
Posta in su cungiau.
Perda po sa contonada.
Perda in sa terra arada.
Crastus de onnia raza.
Texis po aparisciai sa praza.
Coronas a concali po aconculu.
Perda niedda po iscorgiari.
Perda assetiada po isbenari.
Perdixedda coloria po crannaca.
Perdas iscritas po arregodari
Un’omini e unu sembanau.
Perda a muntoni, po unu ch’est passau…
Perda de trombulu, perda po sa frunda.
Perda de trémini tunda.
Perda fata a lacheddu.
Perda fata a giarra
Po una perra de mustazu.
Una mesa de perda, prena de famini.
Perda fata a trebidi, senza fogu.
Perda in d’onnia logu.
Perda iscasciuza, po crobeta.
Perda po sa pinneta.
Perda in su cuili e po s’irrili.
Perda po iscogociari.
Perdixedda po contari.
Un altari fatu de perda.
Perda po costoiri nius de amori:
Perdas ci costointi su dolori!
Unu nuraghe, una omu de janas,
Una tumba de giganti:
Coronas ci anti, su tempus creau.
Artistas ci anti fatu
Cun perdas de Piedadi,
Facis de dolori.
Crastus ci anti mortu
E altaris de cunfortu.
Texis, coronas, crastus
Codula, contonadas,
Rocas de sa terra mia
Malaitas e istimadas.
“PERDAS” de FAUSTINU
Fatas de armonia e sentidu.
Perdas postas in giardinu,
Fatas a morimentu, po arregodu.

(*) Menzione d’onore al 3º concorso internazionale di lingua sarda, Milano, 1993.


Copyright © Gabriele Ortu - Tutti i diritti riservati.
www.gabrieleortu.it – Copyright © Gabriele Ortu, tutti i diritti riservati


Aggiornamento pagina: 06/01/2008
Copyright © 2007-2008 Gabriele Ortu

Menù rapido informazioni