Questo sito utilizza esclusivamente cookie tecnici di sessione, con la sola finalità di permettere la normale navigazione delle pagine web. Non vengono utilizzati cookie di profilazione o tracciamento. Informativa Cookie

Giovedì, 28 Marzo 2024
Impostazioni di visualizzazione: 

www.gabrieleortu.it – Copyright © Gabriele Ortu, tutti i diritti riservati

Feminas de Parteolla (*)

Aprontai lantias
cun ollu virgini,
feminas de Parteolla,
e pregai…
po custa terra asciuta
e po sa scicuta
de cussus cuatru
chi no si scit nudda.
Tocai… Movei… Pregai,
feminas de Parteolla,
faideddu torrai
su tempus bellu de prima.
Alluei is lantias,
in sa cresia de Sibiola
po chi torrit annada bona
de trigu ingraniu, e cantus
di amori in donnia sartu.
Tocai… Movei… Pregai…
Alluei foxilis de cuncordia
in domus de tristura,
feminas de Parteolla.

Baxei a innantis, cun is lantias,
e fadei luxi
in custu mundu scuriosu.
Torrai a tessi’ tramas noas,
po is pipius chena spera
in s’argiola de sa vida.
Torrai a tessi’ lenzolus biancus
po su tempus benidori.
Ahiò! Bogai s’ollu nou
de su rebustu
e carrigai is lantias
po fai gherra a su scuriu.
Tocai, bescei totus impari,
a processioni,
cun is lantias allutas
e tzerriai a boxi arta
a is ominis de su mundu
a si firmai…a penzai…

Feminas de Parteolla,
faideddu torrai,
su tempus de prima.

(*) 1º premio “Città di Dolianova” (poesia in lingua sarda), Dolianova, 1995.


Copyright © Gabriele Ortu - Tutti i diritti riservati.
www.gabrieleortu.it – Copyright © Gabriele Ortu, tutti i diritti riservati


Aggiornamento pagina: 06/01/2008
Copyright © 2007-2024 Gabriele Ortu

Menù rapido informazioni